Oficina de atención única

Vicente Irisarri propón centralizar tódolos trámites administrativos na Oficina de Atención Única
O candidato socialista destaca a necesidade de achegar o Concello aos ferroláns e evitarlles desprazamentos a centros administrativos afastados
Ferrol, 11 de maio de 2007. O candidato do PSdeG-PSOE á Alcaldía de Ferrol, Vicente Irisarri Castro, avanzou hoxe que unha das súas prioridades de goberno será a implantación da Oficina de Atención Única, un instrumento que achegará a administración aos cidadáns e evitará a multiplicidade de trámites e desprazamentos innecesarios a centros administrativos afastados. Un paso máis, subliñou o socialista, na construcción duns servizos públicos coordinados e ao servizo da veciñanza. Tamén nesta liña, Vicente Irisarri aposta pola promoción da administración electrónica, que permitirá a tramitación e seguimento dos expedientes que afecten aos ferroláns, así como á xestión tributaria local. Esta actuación, engadiu, precisará un esforzo previo: ampliar o acceso á Rede na zona rural, xa que o alcaldable socialista subraia que “pagan os mesmos impostos no Callao que en Pazos e, polo tanto, teñen os mesmos dereitos”. Iso si, é consciente de que rematar coa brecha dixital entre ambas zonas requerirá moito esforzo e traballo, que se compromete a realizar.

Vicente Irisarri apuntou hoxe que a administración municipal constitúe un instrumento ao servizo da cidadanía, que debe estar orientado a acadar que esas metas de benestar e de calidade de vida alcancen con equidade á grande maioría dos cidadáns. Por iso, asegurou que os socialistas renovan o seu compromiso de mellora permanente dos sistemas de xestión e coordinación municipal para ofrecer uns servizos de calidade orientados ás necesidades dos veciños. Así, o seu principal obxectivo pasa pola modernización da administración municipal cunha simplificación dos procesos de prestación de servizos a fin de desburocratizar a xestión. Para iso, propón organizar administrativamente o Concello en Áreas de Xestión, que estean máis relacionadas coas distintas actividades e servizos municipais de benestar social, urbanismo, cultura, deporte, medio ambiente ou seguridade cidadá.

O alcaldable socialista apuntou que tamén promoverá a formación dos traballadores públicos co obxecto de atender mellor á cidadanía, e anunciou a elaboración das Cartas de Servizos, que informarán aos ferroláns sobre aqueles que prestan os órganos do Concello, os compromisos de calidade na súa prestación e os dereitos dos cidadáns. En definitiva, Vicente Irisarri concluiu que a vontade do seu partido pasa por ter unha administración local próxima ao cidadán, prestadora de servizos públicos de calidade e capaz de asumir os retos que demanda a sociedade do século XXI.