Medio ambiente

Irisarri aposta pola creación dun punto limpo para depositar residuos perigosos de uso común
Comprométese a establecer plans periódicos de limpeza dos fondos da ría, praias e outros espazos naturais mediante acordos con entidades sociais

Ferrol, 20 de maio de 2007.

O candidato do PSdeG-PSOE á Alcaldía de Ferrol, Vicente Irisarri Castro, comprometeuse hoxe a crear un punto limpo en terreos municipais en colaboración coa Consellería de Medio Ambiente para depositar residuos perigosos de uso común, electrodomésticos, materiais eléctricos ou mobiliario usado. Á par, engadiu que dende o Concello se promoverá tamén a valorización como xestión dos devanditos residuos. O socialista asegurou que esta será unha das súas prioridades no capítulo de medio ambiente se recibe a confianza dos ferroláns o vindeiro día 27. Asemade, apuntou a súa intención de establecer plans periódicos de limpeza dos fondos da ría, praias e outros espazos naturais de valor que poidan levarse á práctica mediante acordos con entidades sociais do entorno ou relacionadas con eses espazos.

Nesta liña, avanzou a súa intención de elaborar un plan forestal que incentive a limpeza e recuperación dos montes da cidade, promovendo políticas de reforestación especialmente nos espazos que sexan patrimonio municipal. Ao respecto, engadiu que os socialistas destinarán os medios precisos para a correcta aplicación da ordenanza reguladora de actividades nos montes e espazos forestais, de modo que se respeten as distancias dende as plantacións ás estradas e se recolla a biomasa para o seu posterior aproveitamento.

Vicente Irisarri destacou que outra das súas prioridades no eido ambiental será a incorporación do contorno da Ermida de Chamorro para a súa reforestación e transformación nun espazo verde de uso público. Asemade, favorecerá a recuperación integral do canle do río da Sardiña e o seu entorno, e propiciará a celebración, cada 5 de xuño, do Día Mundial do Medio Ambiente.

Parque periurbano en Brion

O alcaldable socialista tamén sinalou que será un reto a conseguir a construcción dun Parque periurbano en Brion, apto para o sendeirismo e a práctica de bicicleta de montaña, que se convirta na antesala dun gran anel verde que una os espazos de interese natural como poden ser o entorno dos castelos, Cha de Brion e a Lagoa de Doniños. Asemade, os socialistas defenderán a recuperación integral do parque Raíña Sofía mediante a substitución paulatina das árbores deterioradas por especies singulares, o cambio do peche perimetral, a urbanización interior e unha intervención no parque Aquaciencia.

Co apoio da Consellería de Medio Ambiente, Irisarri Castro avanzou que establecerá plans de vixiancia ambiental no termo municipal que permitan coñecer a calidade do aire, das augas ou o ruído. E, neste punto e co remate da estación depuradora e colectores que se está a levar a cabo en Ferrol, apuntou a necesidade de finalizar tamén as obras de saneamento da zona rural e o seu sistema de depuración.

Neste marco, Vicente Irisarri aposta por establecer un pacto local pola sostenibilidade e a protección do medio e a posta en marcha dun Plan de Actuación Medioambiental para a lexislatura baseado nas conclusións da Axenda 21 Local. Un traballo que se completará coa creación da Axenda Local da Enerxía co obxecto de promover a eficiencia enerxética, a reducción do consumo de auga e a utilización de enerxías renovables no eido municipal, así como introducir criterios de eficiencia enerxética ISO nos procesos de contratación pública.

Por último, o alcaldable socialista subliñou que o seu partido defende a idea de crecemento sostible, un proxecto de cidade no que o desenvolvemento económico e urbanístico non se realice a costa da progresiva degradación do entorno, polo que o seu compromiso será traballar a prol do aproveitamento dos recursos de xeito eficiente e responsable, promovendo políticas nas que a preservación do medio e a recuperación dos espazos degradados se convirtan en sinal de identidade e acheguen valor engadido e calidade de vida á cidade.