Benestar traslada aos domicilios un equipo para avaliar o grao de dependencia dos demandantes de axudas
Benestar traslada aos domicilios un equipo para avaliar o grao de dependencia dos demandantes de axudas
· A edil Beatriz Sestayo estuda ampliar de novo o horario de atención do servizo de información que presta o Concello
· As concellería está a programar visitas das traballadoras sociais de luns a venres, en horario de mañá e tarde
Ferrol, 24 de outubro de 2007.-
A concelleira de Benestar Social, Beatriz Sestayo, anunciou hoxe que o Concello de Ferrol ten previsto aumentar os servizos que vén prestando en materia de dependencia. A edil recordou a posta en marcha, a principios deste mes, do servizo de información a asesoramento sobre a Lei de Dependencia, unha atención que se presta nas propias dependencias municipais os martes e xoves, a partir das 11.30 horas. Ao respecto, Beatriz Sestayo explicou que o seu departamento viuse obrigado pola demanda a ampliar o horario de atención establecido, dende as dúas horas previstas inicialmente ata as dúas horas e media. Unha medida que a edil está a revisar na actualidade coa vista posta nunha futura e inmediata ampliación.
Nesta liña, Sestayo destacou o esforzo que están facendo as traballadoras sociais do Concello para visitar nas súas casas aos solicitantes destas axudas e poder cumprir así os requisitos que marca a citada normativa. Isto é, a valoración social estipulada pola Xunta de Galicia. A concelleira indicou que a concellería decidiu pór en marcha este equipo técnico municipal ante a necesidade urxente de avaliar o grao de dependencia dos demandantes dos servizos que prevé a lei. Unha labor que, na maioría dos casos, é preciso desenvolver nos domicilios dos particulares e que, na actualidade, se está a realizar en horario de mañá e tarde de luns a venres.
Como complemento disto, a Concellería de Benestar Social acaba de comezar a avaliar os expedientes remitidos pola Vicepresidencia do Benestar da Xunta de Galicia, co fin de identificar as persoas gran dependentes no que resta de ano. Así pois, o departamento municipal de servizos sociais está a valorar, ademáis dos expedientes tramitados polo propio Concello, os 84 remitidos esta semana dende a Administración autonómica.
A concelleira tamén recordou que outra das frontes de traballo que está a desenvolver actualmente o Servizo Municipal de Dependencia ten que ver coa coordenación de servizos e programas neste eido.
Axuda a domicilio
Noutro orde de cousas, a edil indicou que xa se tratara na comisión de área a ampliación do servizo de axuda a domicilio co fin de reducir na medida do posible as listas de espera. Sestayo lembrou que os servizos prestados van dende o aseo persoal ata o acompañamento. Asemade e para dar resposta a un servizo amplamente demandado pola cidadanía, a concelleira dispuxo un área con persoal dedicado en exclusiva a esta tarefa. Ao respecto, indicou que a ampliación do servizo de axuda a domicilio foi aprobada por unanimidade en comisión e deberá de ser ratificada no pleno de mañá.
Finalmente, Beatriz Sestayo avanzou que na próxima reunión do Consello Sectorial de Servizos Sociais se dará a coñecer a nova organización da concellería e as súas prioridades. Tamén se presentará o borrador do Plan Estratéxico Ferrol Solidario. Esto será o próximo luns, 29 de outubro, a partires das cinco da tarde.