Irisarri aposta por un novo Ferrol que crea nas súas posibilidades e esqueza o victimismo do PP
Pérez Touriño veu a Ferrol a falar de futuro e comprometerse a que as obras da segunda fase do porto exterior se iniciarán en xaneiro do 2008
Ferrol, 18 de maio de 2007.
Vamos! Ferrol. Con esta mensaxe de ánimo e optimismo comezou e rematou hoxe Vicente Irisarri, candidato socialista á Alcaldía, a súa intervención no mitin central da campaña. Un mitin que, presentado pola deputada autonómica e número catro da lista, Beatriz Sestayo, contou coa presenza do secretario xeral do PSdeG-PSOE, Emilio Pérez Touriño. Vicente Irisarri presentouse a un auditorio dunhas trescentas persoas como o surfista. Explicou que “onte o señor Feijoo asegurou que os ferroláns tiñan que elixir entre un surfista e un señor que tiña arregrado dous buratos e díxoo co desprezo que nace da ignorancia de quen descoñece o surf, porque este deporte é respeto pola natureza, o mesmo que tivo a mocidade coa costa cando nos encheron as dunas de chapapote, o respeto que lle falta a outros cando queren destrozar Ponzos con plantas de acuicultura, é sinónimo de liberdade, de compartirlo todo, de abrir fronteiras lonxe do que fixo este goberno municipal, que só se pechou en Armas”. Puntualizou o socialista que “non é a miña intención pasarme ao pádel, beber viño e conducir despois”.
E, nesta liña, o alcaldable do PSOE asegurou que o Pantin Classic, que fundou e durante 18 anos dirixiu, constitúe un exemplo claro do que pretende facer en Ferrol. Un exemplo de cómo se inician as cousas grandes: con ilusión, con voluntarismo e coa colaboración de tódalas administracións. Vicente Irisarri apuntou que antonte, sentado na súa tabla de surf, lembraba o día de outubro no que Emilio Pérez Touriño o chamou para dicirlle que Galicia necesitaba a Ferrol e que el encabezase un cambio na cidade que a sacase do victimismo ao que a tiña acostumbrada o PP. Nese momento, subliñou Irisarri, prendeu a ilusión no seu corazón. Engadiu que o Partido Socialista non entende de proxectos personais e que, sen dubidalo, nese momento tomou a decisión de ser o candidato en Ferrol.
A partir de entón, o socialista destacou que, coa axuda dun partido forte e cohesionado, como agora está, elaboraron o programa, que recolle tódalas propostas do mundo da muller, da sanidade, da cultura, da educación... Un programa, engadiu, que completou unha lista de xente decente, a que precisa realmente Ferrol. Así, Vicente Irisarri mostrouse firme ao asegurar que “hoxe sabemos o que queremos, como debemos proxectar ese Ferrol do futuro”. E, como primeira medida, avanzou que dende o Concello practicaráse unha política de portas abertas, na que se escoitará a todo o mundo e que evitará os tumultos habituais nos plenos, xa que o PSOE dará participación a todos os veciños.
O socialista tamén asegurou que “vamos a multiplicar a actividade productiva e o emprego, diversificando a economía”. Ao respecto, explicou que ademáis de conservar e potenciar o naval, o PSOE apostará por outros sectores estratéxicos, dende o marisqueiro ata o turismo patrimonial ou deportivo, pasando polo enerxético ou a acuicultura respetuosa co medio. E, nesta liña, citou como ferramenta importante de futuro o Plan Ferrol, que lembrou apoian tanto sindicatos como empresarios. Así as cousas, solicitou aos ferroláns que teñan confianza nas súas posibilidades. “Temos que pensar no presente e no futuro, xa que non vai volver o Ferrol de Carlos III”, subliñou para, acto seguido, pedirlle ao PP que “poña o reloxio en hora”.
Cooperación
Vicente Irisarri tamén avanzou entre as súas prioridades un cambio de rumbo na política urbanística do Concello. E, nesta liña, asegurou que o primeiro que fará será cumprir coas leis e facer caso á Consellería de Política Territorial, porque “vamos a colaborar en lugares de dicir que ninguén nos quere”. Extendeu tamén esa liña de cooperación a outros concellos da comarca, como Fene, Narón ou Valdoviño, e á cidade herculina. Lembrou neste punto a visita que realizou esta semana ao alcalde e candidato socialista, Javier Losada, e subliñou que “xa chegou a hora de que Ferrol e A Coruña deixen de darse a espalda”.
Asemade, o socialista indicou que se ía ocupar das persoas, despois de que durante os últimos catro anos o PP nada fixese neste campo. “Cometimos erros, pero ninguén nos pode negar o mérito de ter universalizado as pensións, a sanidade, a educación e, agora, a atención ás persoas maiores”, indicou para engadir que “levaremos a cabo todos estes plans coa única receta que coñecemos: o traballo”. “Non volveremos a botarlle a culpa ao árbitro”, afirmou. Aínda así, “necesitamos o respaldo decidido da Xunta e o seu apoio en Madrid e Bruxelas”. Admitiu que “xa o notamos” e, neste senso, puxo como exemplo delo a segunda fase do porto exterior.
Nembargantes, Vicente Irisarri apuntou toda unha serie de proxectos que precisan desa colaboración institucional. Así, citou a chegada do ferrocarril ao porto exterior; o saneamento integral da ría esquecido durante anos polo Goberno de Fraga; a posta en marcha dun Plan Director que permita aos ferroláns disfrutar do patrimonio de Defensa; a Vía de Alta Capacidade que una a cidade con Barreiros pola costa, ou a construcción de vivendas protexidas.
Por último, Irisarri salientou que “esta última semana os socialistas temos que convencer aos cidadáns da importancia do voto”. Así, puxo como principal tarefa “saír á rúa para dicirlles aos ferroláns que isto ten solución, pero que hai que ir ás urnas”. O resto do traballo, concluiu, “farémolo a partires do día 28”.
Falar de futuro
Pola súa banda, Touriño comezou o mitin en Ferrol afirmando que “hoxe veño a falar de futuro, de ilusión, de proxectos; o pasado xa pasou onte por aquí por Ferrol, o pasado rematou onte aquí”, en alusión á presenza de Aznar nesta cidade. “Onte estivo aquí o pasado, e Ferrol o que precisa é futuro”. E, nesta liña, Touriño amosouse convencido de que o vindeiro 27 de maio “os ferroláns van a apostar polo futuro, por Vicente Irisarri”. Pérez Touriño subliñou que os ferroláns “van a apostar por construír unha “cidade vital, innovadora, emprendedora, moderna, dinámica e aberta, van a apostar porque Ferrol recobre o protagonismo que merece, que lle corresponde en Galicia. Cos socialistas Ferrol volverá a ser unha cidade innovadora, de referencia en Galicia”. Así, apuntou que “o que está en xogo en Ferrol o 27 é seguir ancorados no pasado ou incorporarse ao futuro”.
O secretario xeral do PSdeG-PSOE asegurou tamén que o compromiso firme e inquebrantable dos gobernos socialistas de Galicia e España con Ferrol outorgarán á cidade unha nova posición central no eixo Porto-Xixón, grazas á culminación das novas infraestruturas de comunicación, á segunda fase do Porto Exterior e á diversificación industrial promovida desde o Plan Ferrol da Xunta. Por iso, animou a respaldar de xeito maioritario a candidatura de Vicente Irisarri á alcaldía, para que Ferrol se sume ao cambio iniciado en Galicia nas pasadas autonómicas e non lle dea as costas ao progreso. Asemade, Pérez Touriño incidiu en que Ferrol necesita un alcalde como Vicente Irisarri para frear proxectos como a destrución da Fraga de Menáncaro ou a privatización da Praza de España. Un alcalde socialista que, co seu proxecto, volva ilusionar á cidade, a saque da situación de parálise e regresión e a sume ao cambio de progreso que viven Galicia e España cos Gobernos socialistas de Touriño e Zapatero.
Destacou que os Gobernos central e autonómico están a apostar como nunca por Ferrol, con “moitos e moi potentes” investimentos que sen dúbida permitirán abrir “unha nova fase na historia da cidade”. Así, incidiu en que a segunda fase do porto exterior se iniciará en xaneiro de 2008, fronte ás falsidades difundidas pola dereita de que o Goberno central non acometería esta obra. Mentres tanto, estase a traballar para rematar no inicio do vindeiro ano o acceso terrestre a esta dársena, no que se invisten 55 millóns de euros, e están en estudo informativo o acceso ferroviario ao porto, cun investimento de entre 70 e 115 millóns.
En materia de infraestruturas terrestres, o líder dos socialistas galegos sostivo que Ferrol deixará de estar illada e en breve poderá presumir dunha situación “enormemente mellorada” grazas ao esforzo dos gobernos socialistas do Estado e Galicia. A este respecto, lembrou que a Xunta está a investir case 250 millóns de euros na vía de alta capacidade Ferrol-San Cibrao e 185 millóns para rematar a autovía Ferrol-Vilalba. Ademais, salientou que o Ministerio de Fomento está a investir 33 millóns de euros no acceso norte por Fene, Neda e Narón –que entrará en servizo en 2008-, e destinará 65 millóns á vía de alta capacidade San Cibrao-Barreiros, agora en estudo informativo. No tocante ao tren de alta velocidade, incidiu en que a conexión co eixo atlántico será unha realidade grazas ao investimento de 413 millóns de euros.
“Os Socialistas temos a firme vontade de que Ferrol se incorpore por completo ao desenvolvemento do corredor litoral de Galicia. As novas infraestruturas de comunicación outorgarán a Ferrol unha nova posición central”, salientou Pérez Touriño, para incidir en que a mellor mostra dese compromiso é a aprobación do Plan Ferrol por parte do Goberno que preside, que mobilizará un investimento global de 3.000 millóns para incorporar Ferrolterra ao dinamismo económico. Un plan, concluiu, que permitirá a diversificación industrial da zona e a habilitación de máis de 3,6 millóns de metros cadrados de solo industrial.